Í fréttum er þetta helst

miðvikudagur, mars 16, 2005

Skyggni ágætt

Það virðist sem vorið sé alveg að bresta á eftir nokkuð kaldan vetur. Í dag og í gær er sól og 15°C hiti og samkvæmt tíu daga spá veðurstöðvarinnar að Dom-Pedro Strasse er 20°C hiti í kortunum um og eftir næstu helgi.

Nú er bara að vona að það verði blíða í næstu viku þegar pabbi og mamma mæta á svæðið - ekki myndi nú skemma fyrir að komast í bjórgarð þá, ha?

Leitað langt yfir skammt

Fórum á yfirfullan mexíkanskan stað á mánudagskvöldið þar sem ca. 15 íslendingar hittust til að eta og drekka áður en farið var á tónleika með Emiliönu Torrini sem heiðraði Münchenarbúa með nærveru sinni það kvöld. Það kom náttúrulega ekki annað til greina en að mæta á tónleikana og styðja Frónbúann.

Uppselt var og því nokkuð troðið á staðnum en það kom ekki að sök þar sem dagskrá tónleikanna var í rólegri kantinum (fyrir utan breskan kappa sem hitaði upp með nokkuð fjörugum mjaðmasveiflum í takt við ágætis flutning).

Undirritaður hafði ekki gert sér miklar vonir um tónleikana en þeir reyndust hins vegar þrælgóðir.