Í fréttum er þetta helst

föstudagur, janúar 27, 2006

Er það furða

... að þessi maður sé vinsæll í Þýskalandi. David Hasselhoff hefur allt sem til þarf. Ég bendi á vídeóið hér að neðan því til stuðnings en þar hefur hann sér til fulltingis hana Leoncie sem sér um undirleik og Helga Má sem gerði myndbandið og sést bregða fyrir í lokin með grímu (ekki furða).

Njótið hér.

þriðjudagur, janúar 24, 2006

Skítakuldi

Ætli það sé nú ekki kominn tími til að ég bloggi, það er nú orðið bara Maggi sem heldur þessari síðu gangandi. En nú ætla ég að fara að taka mig aðeins á. Eins og flestir vita þá var ég á Íslandi í 2 mánuði og kom aftur hingað þann 9. janúar. Það er nú alltaf ósköp gott að koma heim til sín þó að ég hafi haft það mjög gott á 5 stjörnu hótel mömmu á Íslandi.
Héðan frá Munkaþverá er annars lítið að frétta, ég lá í flensu alla síðustu viku en er nú öll að hressast. Það er nú ekkert skrítið að maður leggist í flensu við að koma hingað miðað við þann skítakulda sem hér er. Mínusgráðurnar hafa farið niður í allt að 20 gráður á nóttunni hér rétt utan borgarinnar.
Annars skelltum við okkur á skíði síðustu helgi, Maggi fór á laugardagsmorgninum og skíðaði bæði laugadag og sunnudag en ég fór ekki fyrr en á sunnudagsmorgninum. Ég þorði ekki að skíða 2 daga þar sem ég var að stíga upp úr veikindum. Við vorum á skíðasvæði í Austurríki sem er ekki nema rétt rúman klukkutíma frá Munchen. Þetta var alveg frábær dagur, veðrið var fínt, frekar hlýtt, það eina sem hægt var að kvarta yfir var þokan, maður sá nánast ekki neitt í hæstu brekkunum. Skíðafærið gat annars ekki verið betra og ég held ég hafi bara aldrei áður skíðað í svona miklum snjó.
Eva Mjöll systir fer svo með honum Gunna sínum og krökkum úr hjálpasveitinni í Garðabæ til Austurríkis á skíði næstu helgi á svæði sem heitir St. Anton og við ætlum að fara og skíða með þeim í 2 daga. Helgina þar á eftir verða svo foreldrar hans Magga á skíðum á Italíu og ætlum við að reyna að fara og hitta þau líka.

föstudagur, janúar 20, 2006

Det sner i Danmark

Þetta er skrifað á Arlanda flugvelli í Svíþjóð klukkutíma eftir að ég á að vera farinn upp í vél til Köben og þaðan til München. Búinn að vera þrjá daga í Uppsölum.

Helge sagði mér í gærkvöldi að fyrsti snjórinn í Köben hefði fallið í gær en ég kippti mér nú ekki upp við það búandi í München þar sem er snjór í a.m.k. þrjá mánuði streit. Það sem ég vissi ekki er að Danir eru algjörar pjásur og um leið og það sést snjóföl á jörð er öllum brautum á Kastrup lokað nema einni og því er búið að seinka eða aflýsa öllu flugi þar í gegn.... Arrrg.

Jæja, maður verður bara að líta á björtu hliðina sem er sú að á morgun og sunnudaginn verðum við á skíðum í Zillertal í Austurríki með Dabba, Sigga og Thomasi. Spáin er góð.